pidato pasambahan makan di minangkabau

PASAMBAHAN MAKAN

pasambahan pidato adat ka makan di minangkabau di dalam masyarakat bisa di bilang wajib bagi masyarakat minang karena merupakan tradisi turun temurun di minangkabau. berikut adalah contoh singkat alu pasambahan ka makan di nagari sijunjung..

Pangka:

Mano nyo sutan sati , sambah di pulangkan kabakeh sutan sati

Alek:

Kapado allah

Pangka:

Sungguah sutan surang nan tasabuik namo di panggiakan gala, rapeklah ka sagalo sidang mujili nan ado, Nan tahampa di ateh lantai, nan tasungkuik di bawah atok, nan salirik salingka dindiang. Ketek indak di sabuik namo gadang indak di panggiakan gala. Namun, tembak nak baalamaik iyo ka sutan juo ambo mamulangkan sambah.

Alek:

Kapado kito basamo

Pangka:

Mintak ampun ambo kapado allah mintak maaf ka nan banyak, niniak mamak pangulu nan gadang basah batuah, nan bapucuak sabana bulek nan baurek sabana tunggang, alim ulama jo tuanku cadiak pandai pagaran kokoh, manti jo pegawai adat bundo kanduang samo di dalam, dalam panggilan ambo juo. Tahantak putiang di hulu di bawah kumpalan tali asanyo undiang dek kan lalu tigo limbago nan tarjoli. Partamo sombah manyombah ,Kaduo siriah jo pinang, Katigo baso jo basi , Sombah manyombah dalam adat, tali batali dek undang-undang tasabuik dek muluik manih tapakai dek baso baiak, adat banamo sopan santun. Adat di lawik bajuru mudi, adat di alek bajaro janang, adat basabuang bajuaro. Jikok di kaji adat di sijuru mudi tau nyo di angin nan basiru tau di ombak nan basabuang pandai manjago pasang angin turun naiak, jikok di kaji adat sijaro janang tau jo ereng dengan gendeng tau di warih nan balabeh tau jo bayang kato sampai pandai manjago labiah jo kurang. Jikok di kaji sabuang nan bajuaro, taunyo di tuah sisiak ayam, tau nyo dibulang nan bakiyeh pandai manjago tampin taruah

Sombah sabarih ka bakeh sutan...

Alek:

Manitah lah

Pangka:

Karajo nan kadiparsambahkan kabakeh sutan, kok dicari sidang bapokok karajo nan bajunjuang sakik nan baasa kato nan bapokok pangka kan iyo ado pokok pangka nyo, mano nan kajadi pokok pangka nyo iyolah tantangan hidangan nan katangah, jikok di tilek di pandang mato di silau di pandang 

roman kan lah baraso cukuik sarat jo rukun nyo mangko di ibarat kan pituah hodi malayu

Sipupuik babaju lapang

Di bari guntiang tauo

Nan di tuntuik nan lah datang

Kami mananti lah cukuik gonok pulo

Pihak di hari nan sahari nangko  bakato undang jo bida dek bida parandain kato, kok manimbang di tampek nan ado kok basiang di tampek nan tumbuah, tumbuah sarupo iko kini. Dek pandai janang manatiang nan tau di gorak dengan raso lah tadanga piriang babunyi iyo di dalam padapuran, lah diliek lah di lengong cukuik barisi cawan pinggan, janang manatiang di ruang tangah takanak kupiah di kapalo lakeklah saruang tanunan arab bugi makasar urang namo kan. Manatiang nasi dengan gulai, jawek bajawek sapiriang nasi lego balego sapiriang gulai, kok cerek mamocah ruang, galeh babilangan tangan. pihak kapado susunan jamba di tapi samuik bairiang di tangah awan bajambu langkok barisi kasadonyo, Pihak di nasi nan ka tangah padi sijirak rumbun tulang tumbuah di padang patapahan iyo di lereng kadataran, jamu di tumbuok pantang basakam di tampi mangko badadak di indang mangko ba atah bareh putiah alang kupalang dek takalo maso daulu nyo. Dek takalo bijo kadatang di sabalah ruhun tanah nyo nyaman di baok dek datuak suri di rajo duo jo cati bilang pandai, Dek takalo maso itu dek ayie basentak turun dek bumi basentak nanyiak mangko di bueklah sawah dengan ladang, sawah batumpak di nan data ladang babidang dinan lereng banda baliku turuik bukik, satangkai padi di tuai makanan Korong dengan kampuang, padi nan indak manaruah ampo padi bone sajo satangkai nyo.

Baapoto nyo kini mangko ambo liek kiri jo kanan ambo pandangi hilia jo mudiak baraso lah cukuik sarat jo rukunnyo mangko di ibarat kan pituah hodi malayu

  

Baringin di pakan sinayan

Pancaringek pawutan jawi

Jawi anak urang koto marapak

Aie dingin kan pabasuah tangan

Aie angek kan paubek awih

Nasi kan paubek litak

Apo di cancang apo badotak

Kulik manyiah di ateh atok

Jarami di ateh kudo

Karano hidangan alah talak

Ambiak ayie nasi nak di santok

Ambo pun nak sato pulo

Sekian sambah bilang lah sampai ma sutan...